ଘନଶ୍ଯାମକୁ କହ ଗୋ

Want create site? Find Free WordPress Themes and plugins.

ଘନଶ୍ଯାମକୁ କହ ଗୋ ଦୂତିକେ ଯାଇ ।
ଘନ ଘନ ବୃଷଭାନୁସୁତା ନେତ୍ରୁ ନୀର ବହଇ । ଘୋଷା ।

ଘନେ ଯେସନେ ଚନ୍ଦ୍ରମା, ସେହିପ୍ରାଏ ରାଜଜେମା
ଘର ମଣିଲେଣି ରମ୍ଭା ବନ ପରବତ ଭୂଇଁ ।
(ପଡ଼ି) ଘୋର ମନୋହର କୁଞ୍ଜ
କୁଟୀରେ ଦେଇ ସଞ୍ଜ
ଆସିଛି ଦୈତ୍ୟଗଞ୍ଜ
ଦୁଃଖୀ ଆରତଭଞ୍ଜ
ଆସ ନୟନକଞ୍ଜ
ଶ୍ରୀମତୀ ସଙ୍ଗେ ରଞ୍ଜ
ମାର ଦର୍ପକୁ ଗଞ୍ଜ ନିକୁଞ୍ଜ ବରବିରହୀ । ୧ ।

ଘନେ ତାପବଳୀ ରିପୁ, ପ୍ରହାରଇ ପବିଦର୍ପୁ
ଘଡ଼ିକେ ପାଇଲା ବପୁ ଗମାର ମାଗଣା ଦେହୀ ।
(ପଡ଼ି) ଘର୍ଘର ଘଡ଼ଘଡ଼ି
ନାଦ ତ ତଡ଼ବଡ଼ି
ଦେଉଛି ଘଡ଼ି ଘଡ଼ି
କାମ ଶମନ ଧାଡ଼ି
କହିଛି କର ଯୋଡ଼ି
ଦାସୀ ଭୂମିରେ ପଡ଼ି
ହା କୃଷ୍ଣ ବୋଲିଣ ବିବେକ ଜ୍ଞାନ ହଜାଇ । ୨ ।

ଘୃମିତ ଲୋଚନ ଦିଶେ, ସ୍ନେହିତ ଦଳା ବିଶେଷେ
ଘୃଣା ପାଇବାରୁ ହାସେ ସେ, ଊଣା ତେଜ ତା ଦିଶଇ ।
(ପଡ଼ି) ଘଟଣ ମୁଖ ଶ୍ରେଣୀ
ବିମଳ ଦିଶିଲାଣି
ଘନକୁନ୍ତଳ ବେଣୀ
ଫିଟି ଲୋଟେ ଧରଣୀ
ଘଟସ୍ତନାର ପୁଣି
ନୟନୁ ବହେ ପାଣି
ଜାଣ ନାହିଁ କି ବେଣୁପାଣିକି କହିବଇଁ । ୩ ।

ଘୁମା ମାଇଲା ପରି ରାଧା, ଘୋଟିଛି ବିରହ ବାଧା
ଘାରି ହୋଇ ଢଳି ପଡ଼ୁଁ ତୋଳି ଧଇଲେ ପ୍ରମଦା ।
(ପଡ଼ି) ନିଶାର୍ଦ୍ଧକାଳେ ଭେକ
-ବୃନ୍ଦ ଦିଅନ୍ତି ଡାକ
ସାମୁକ ମକ ମକ
ଝିଙ୍କାରୀ ସ୍ୱନ ଟେକ
ଶୁଣି କର୍ଣ୍ଣ ତଦ୍ଦକ
ହୃଦୟ ଦକ ଦକ
କରାଇ ଦିଏ ମୁକ ନିଜର କଥା ଏହି । ୪ ।

ଘେନିଯାଅ ଏ ବାରତା, ବୋଧିଆଣ ରସିକତା
ଘାଣ୍ଟି ହେଉଛି ଅଙ୍ଗ ତା ତେଣୁ ଛନ୍ତି ପଠିଆଇ ।
(ପଡ଼ି) ଘନାନ୍ତେ ଲେଖା ଲେଖି
ଦେଲେକ ଚନ୍ଦ୍ରମୁଖୀ
ତା ଘେନି ଚଳେ ଦୂତୀ
ହୋଇଣ ନିରିମାଖି
ଚନ୍ଦ୍ରାବଳୀର ପୁରେ
ଶ୍ରୀକୃଷ୍ଣ ଥିବା ଦେଖି
ଗୀତେ କହେ ଗୋବିନ୍ଦ ଗବାକ୍ଷେ ପତ୍ର ଦେଇ । ୫ ।

Did you find apk for android? You can find new Free Android Games and apps.

ମତାମତ ଦିଅନ୍ତୁ